ایمز ٹی وی(بنوں)خیبرپختون خوا کے ضلع بنوں میں 3 روزہ انسداد پولیو مہم کا آج دوسرا دن ہے۔ مہم کے دوران ایک لاکھ 78 ہزار سے زائد بچوں کوپولیو ویکسین پلانے کا ہدف مقرر کیا گیا ہے۔بنوں میں جاری انسداد پولیومہم کےدوران آئی ڈی پیز کےبچوں کو بھی پولیو ویکسین پلائی جائیں گی۔پولیومہم کی نگرانی پاک فوج اور پولیس کی مشترکہ ٹیم کررہی ہے،حساس مقامات پرپولیو ورکروں کی حفاظت پاک فوج اورپولیس کے جوان کررہے ہیں،اس مہم کیلئے540 ٹیمیں تشکیل دی گئی ہیں، جو گھر گھر جا کربچوں کو پولیو ویکسین پلا رہی ہیں۔

ایمز ٹی وی(ایجوکیشن)چھ سالہ بچے نے کم عمر میں مائیکروسوفٹ سرٹیفائڈ بننے کا اعزاز اپنے نام کرلیا ہے۔مائیکروسوفٹ کا امتحان جو بڑے بڑے دینے سے گھبراتے ہیں وہ لاہور کے رہائشی چھ سالہ بچے نے نہ صرف دیا بلکہ اس کو شاندار نمبروں سے پاس بھی کیا اور کم عمری میں ہی مائیکروسوفٹ سرٹیفائیڈ کمپیوٹر ماہر بن گئے محمد حمزہ شہزاد نے مشکل ترین امتحان میں سات سو ستاون نمبر حاصل کیے جبکہ پاس ہونے کے لیے سات سو نمبر ضروری تھے، دو ہزار گیارہ میں حمزہ شہزاد اپنے والدین کے ہمراہ برطانیہ منتقل ہوگئے تھے۔حمزہ شہزاد کے والدین کا کہنا ہے کہ انہیں اپنے بیٹے پر فخر ہے اور چاہتے ہیں حمزہ ٹیکنالوجی کی دنیا میں پاکستان کا نام روشن کرے

ایمز ٹی وی(ایجوکیشن)وفاقی اردو یونیورسٹی کے وائس چانسلر ڈاکٹر ظفر اقبال کو ان کے عہدے سے فارغ کر دیا گیا۔ جس کے بعد جامعہ کراچی کے وائس چانسلر ڈاکٹر قیصر نے جامعہ اردو کے قائم مقام وائس چانسلر کی حیثیت سے چارچ سنبھال لیا ہے۔ ڈاکٹر ظفر اقبال کو کرپشن کے الزامات پر صدر پاکستان نے گزشتہ سال 20دسمبر کو رخصت پر بھیج دیا تھا، تاہم ڈاکٹر ظفر اقبال نے عدالت سے حکم امتناع لے لیا تھا۔ کل رینجرز اور پولیس نے مشرکہ کارروائی کرتے ہوئے، وفاقی اردو یونیورسٹی گلشن کیمپس کراچی میں واقع رجسٹرار آفس کا تالا توڑ کر قائم مقام وائس چانسلر ڈاکٹر قیصر کی تعیناتی ممکن بنائی۔ رجسٹرار جامعہ اردو کے مطابق ڈاکٹر ظفر اقبال کی جانب سے 20دسمبر 2014اور 28مئی 2015کے درمیان جاری کئے گئے، تمام انتظامی و مالی امور سے متعلق احکامات کالعدم قرار دے دیئے جائیں گے۔

ایمز ٹی وی(ٹیکنالوجی)سائنس اور ٹیکنالوجی میں ہونے والی ترقی کی بدولت غیرروایتی ذرائع سے توانائی حاصل کرنے کے لیے منفرد آلات ایجاد کیے جارہے ہیں۔

چلی میں نوجوان انجنیئروں نے ایسا آلہ ایجاد کرلیا ہے جو گملے میں اُگے ہوئے پودے سے توانائی حاصل کرکے اسے بجلی میں تبدیل کرسکتا ہے! بجلی کی مقدار اتنی ہوتی ہے کہ اس سے موبائل فون بہ آسانی چارج ہوجاتا ہے۔ درحقیقت یہ آلہ موبائل فون چارجر ہی ہے جو پودے سے حاصل کردہ توانائی کو برقی رَو میں بدل دیتا ہے۔ تین انجنیئروں نے یہ موبائل فون چارجر چھے سال کی محنت کے بعد تیار کیا ہے۔ موبائل چارجر کو E-Kaia کا نام دیا گیا ہے۔

E-Kaia پودوں سے بجلی بنانے والی پہلی ڈیوائس نہیں ہے۔ اس سے پہلے بھی اس نوع کے آلات بنائے جاچکے ہیں مگر وہ زیادہ مؤثر نہیں تھے۔ موبائل فون ان سے بھی چارج ہوجاتا تھا ،مگر وہ اتنی توانائی کم از کم 100مربع میٹر میں لگے ہوئے پودوں سے حاصل کرتے تھے۔ بہ الفاظ دیگر وہ اتنے رقبے میں لگے ہوئے پودوں سے موبائل چارج کرتے تھے، تاہم E-Kaia یہ کام محض ایک ہی پودے سے کرسکتا ہے۔ یہ ایک مستطیل ڈبے نما ڈیوائس ہے جس کے ایک سرے پر بایوسرکٹ اور دوسرے پر آؤٹ پُٹ موجود ہے۔ بایوسرکٹ والا سِرا مٹی میں دبا دیا جاتا ہے اس طرح کے پودے کی جڑ اور پتّے اس سے مَس ہوتی رہیں۔ پودے سے کشید کی جانے والی توانائی 5 وولٹ اور 600 ملی ایمپیئرز تک پہنچ جاتی ہے۔ اتنی مقدار میں توانائی کی آمد موبائل فون کو ڈیڑھ گھنٹے میں چارج کردیتی ہے۔ یہ وقت کم وبیش اتنا ہی ہے جتنا ایک عام چارجر موبائل فون چارج کرنے میں لیتا ہے۔ اہم بات یہ بھی ہے کہ اس ڈیوائس سے پودے کو کوئی نقصان نہیں پہنچتا۔

E-Kaia پیٹنٹ کرائے جانے کے مراحل میں ہے،اسی لیے اس میں استعمال کردہ ٹیکنالوجی کی تفصیلات جاری نہیں کی گئیں۔ E-Kaia کے تخلیق کاروں میں شامل ایولن ایراوینا کا کہنا ہے کہ وہ اور اس کے ساتھی اپنی ایجاد کو طاقت وَر بنانے پر بھی کام جاری رکھے ہوئے ہیں، کیوں کہ ابتدائی طور پر یہ آلہ ایل ای ڈی ز اور موبائل فون کے لیے برقی توانائی مہیا کرسکتا ہے۔ ایولن کے مطابق اگلے مرحلے میں اسے پودوں اور درختوں سے نسبتاً بڑے آلات کو بجلی کی فراہمی کے قابل بنایا جائے گا۔ ایولن کے مطابق ان کی ایجاد دنیا میں اپنی نوعیت کی واحد ایجاد ہے، اس لیے اس میں بہتری کی خاصی گنجائش موجود ہے۔

E-Kaia بالخصوص بجلی کی قلت کا شکار خطوں میں رہنے والوں کے لیے ایک نعمت سے کم نہیں ہوگا جہاں لوڈشیڈنگ کے باعث موبائل فون چارج کرنا مشکل ہوجاتا ہے۔