ایمز ٹی وی(سرینگر) مقبوضہ کشمیر کے دارالحکومت سرینگر کے قصبے ترال میں بھارتی فورسز نے سرچ آپریشن اور مجاہدین سے مقابلے کی آڑ میں ایک گھر کو کئی گھنٹے محاصرے کے بعد بارودی مواد سے تباہ کر دیا دونوں اطراف سے فائرنگ کا شدید تبادلہ ہوا جس میں 2 مجاہد کمانڈروں سمیت 5 شہید ہو گئے تاہم بھارتی فوج نے رات گئے تک ایک مجاہد کے شہید اور 4 فوجیوں کے زخمی ہونے کی تصدیق کی تھی۔ شہید ہونیوالے مجاہدین میں حزب المجاہدین کے کمانڈر ذاکر موسیٰ، کمانڈر سبزار بھٹ، سینئر مجاہد عاقب ذیشان اور ان کے 2 ساتھی بتائے جا رہے ہیں۔ ادھر بھارتی فوج کے گھیرائو کی اطلاع ملتے ہی سینکڑوں افراد مجاہدین کو بھارتی فوج کے نرغے سے نکالنے کیلئے جمع ہو گئے اور احتجاج شروع کر دیا اس دوران کشمیری نوجوانوں نے بھارتی فوج پر شدید پتھراو کیا اور ایک سی آر پی ایف اہلکار کی رائفل چھین لی۔
کٹھ پتلی انتظامیہ نے سخت کشیدہ صورتحال کے پیش نظر علاقے میں فوج کی مزید نفری بھجوا دی جبکہ کرفیو لگا دیا گیا۔ مجاہدین سے مقابلہ جاری تھا۔ میرواعظ عمر فاروق کی زیر قیادت حریت فورم نے ضلع پلوامہ کے علاقے رتنی پورہ میں رات کے دوران چھاپوں میں درجنوں نوجوانوں کی گرفتاری اور مکینوں کو ہراساں کئے جانے کی شدید مذمت کرتے ہوئے اسے غیر جمہوری اور غیر اخلاقی عمل قرار دیا۔ فورم کے ترجمان نے سرینگر سے جاری ایک بیان میں کہا کہ ان کارروائیوں کا مقصد کشمیریوں کو طاقت اور تشدد کے ذریعے مبنی برحق جدوجہد سے دستبردار کرناہے۔ ترجمان نے مرن چوک پلوامہ میں بھارتی فورسز کے ہاتھوں ایک نہتے نوجوان محمد ایوب وانی کی شہادت پر شدید تشویش کا اظہار کرتے ہوئے کہا کہ مسئلہ کشمیر کا حل نہ ہونا خطے میں آئے روز نہتے لوگوں کے قتل کا سبب بن رہا ہے۔
علاوہ ازیں کل جماعتی حریت کانفرنس نے بھارتی وزیر اطلاعات و نشریات ونیکیا نائیڈو کے اس بیان کہ ”آزادی کا نعرہ لگانا غداری کے ز±مرے میں لایا جائے گا“ کو فرسٹیشن قرار دیتے ہوئے کہا ہے کہ بھارت کا بڑی جمہوریہ کا دعویٰ دن بدن ایکسپوز ہورہا ہے اور یہ ملک دنیا میں ایک سامراجی اور فاشسٹ قوت کے طور پر سامنے آرہا ہے۔ حریت کے مطابق رامجاس کالج، دلی کی جواہر لعل نہرو یونیورسٹی اور دوسرے تعلیمی اداروں میں کشمیر کی آزادی کی حق میں اٹھنے والی آوازوں میں بھارت کے لیے ایک واضح پیغام پوشیدہ ہے کہ اس ملک کے عوام اب ”حقیقتِ کشمیر“ کو سمجھنے لگے ہیں اور وہ اپنے حکمرانوں کی کشمیر پالیسی سے نہ صرف بیزار ہیں، بلکہ وہ کھل کر اس کی مخالفت بھی کرتے ہیں۔
حریت کانفرنس نے ان بھارتی شہریوں کا شکریہ ادا کیا، جو کشمیری قوم کی جدوجہدِ آزادی کی حمایت میں سامنے آتے ہیں اور یہاں کے عوام کے ساتھ کئے گئے وعدوں کو پورا کرنے کے حق میں آواز اٹھاتے ہیں جبکہ بھارت کا پرنٹ اور الیکٹرانک میڈیا اگرچہ اس ملک کے لوگوں کو کشمیر کے حوالے سے گمراہ کرنے کی انتھک کوششیں کررہا ہے
ایمزٹی وی(اسپورٹس)پشاور زلمی کے کپتان ڈیرن سیمی نے پی ایس ایل کا فائنل جیتنے کی صورت میں پوری ٹیم انتظامیہ اور ٹیم آنر جاوید آفریدی سمیت آدھا سر منڈوانے کا اعلان کردیا۔
تفصیلات کے مطابق ملک میں طویل عرصے سے ویران میدانوں میں آج ایک بار پھر کرکٹ کا میلہ سجنے والا ہے اور پاکستان سپر لیگ کے دوسرے ایڈیشن کا فائنل آج لاہورمیں پشاور زلمی اور کوئٹہ گلیڈی ایٹرز کے درمیان کھیلا جائے گا جب کہ ملک بھر میں پی ایس ایل کا بخار سر چڑھ کر بول رہا ہے۔
اسی جوش و جنون میں مد مقابل ٹیموں کے کھلاڑی بھی جیت کی صورت میں خوشی کے مارے طرح طرح کے اعلان کررہے ہیں۔گزشتہ روز پشاور زلمی کے کپتان ڈیرن سیمی نے ٹیم مالک جاوید آفریدی کے ہمراہ ایک ویڈیو شیئر کی ہے جس میں انہوں نے پی ایس ایل کا فائنل جیتنے کی صورت میں پوری ٹیم ، انتظامیہ اور ٹیم آنر جاوید آفریدی سمیت آدھا سر منڈوانے کا اعلان کردیا۔
ایمزٹی وی(اسپورٹس)چیئرمین پی ایس ایل نجم سیٹھی نے طالبات اور معذور افراد کے لئے فری ٹکٹس کااعلان کردیا۔ تفصیلات کے مطابق چیئرمین پی ایس ایل نجم سیٹھی کا میڈیاسے گفتگو کرتے ہوئے کہنا تھا پاکستان سپر لیگ کے فائنل میچ میں شرکت کیلئے طالبات کیلئے 8000 روپے والے ایک ہزارفری ٹکٹس جبکہ معذور افراد کیلیے8000 روپےوالے500فری ٹکٹس رکھے گئے ہیں جوکہ پہلے آئیں اور پہلے پائیں کی بنیاد پر مہاکی جائیں گی ۔
انہوں نے کہاکہ کوئٹہ گلیڈی ایٹرز میں 4متبادل انٹریشنل کھلاڑیوں کو شامل کرلیا گیا ہے جبکہ اس بات کی بھی تصدیق ہوگئی ہے کہ پشاور زلمی کے تمام غیر ملکی کھلاڑی لاہور میں ہونیوالے پی ایس ایل فائنل میچ میں پرشرکت کریں گے جبکہ معذورافرادصبح9 تا2بجے شناختی کارڈ لے کر ہوٹل پہنچیں اورٹکٹ ہولڈرز حضرات شناختی کارڈ لے کراسٹیڈیم آئیں کیونکہ قذافی اسٹیڈیم کے دروازے شام5:45 بند کر دیے جائیں گے۔
ایمزٹی وی (اسلام آباد)تحریک انصاف لاہورکے سابق سیکریٹری اطلاعات فرخ جاوید مون نے کہا ہے کہ پی ایس ایل فائنل میں کرکٹ کے قومی ہیروکودعوت نہ دینا قابل مذمت ہے اورایسے ہتک آمیزرویے کی ذمہ دارپناما میں پھنسی حکومت اورپی سی بی ہیں۔
میڈیا سے گفتگو کرتے ہوئے فرخ جاوید مون نے کہا کہ کتنے دکھ کی بات ہے کہ ایک میچ کی خاطرپورے لاہورشہرمیں کرفیوں کا سماں ہے اسکول،شادی ہالز،کالجز،ہوٹل،ریسٹورنٹ ،پارکس،کلینک سمیت سب کچھ بند اورشادیاں بھی منسوخ کروادی گئیں اورسیکیورٹی پراربوں کے اخراجات ہوں گے جبکہ سرکاری ہسپتالوں میں ادویات اورمریضوں کیلئے بیڈ
نہیں اورپاکستان اسٹیل کے ملازمین کوتنخواہ دینے کیلئے حکومت کے پاس پیسے نہیں ہے۔
انہوں نے کہا کہ شریف برداران عمران خان کی مقبولیت سے خوفزدہ ہیں اوراسی خوف کے ڈرسے (ن)لیگی درباریوں نے اسٹیڈیم میں نوازشریف کی موجودگی میں‘‘گونوازگو’’کے نعروں کوروکنے کیلئے ساری ٹکٹیں خرید کر(ن)لیگی کارکنوں کوبانٹ دیں۔انہوں نے کہا کہ حکومتی درباری جومرضی کرلیں قذافی سٹیڈیم میں نوازشریف کی موجودگی میں ‘‘گونوازگو’’کے نعروں سے گونج اٹھے گا۔
ایمزٹی وی(اسلام آباد) پاک فوج کے شعبہ تعلقات عامہ (آئی ایس پی آر) کے مطابق ملک میں چھٹی مردم شماری کے کامیاب انعقاد کے لئے تمام تیاریاں مکمل ہیں۔
آئی ایس پی آر کے مطابق ملک میں رواں ماہ سے شروع ہونے والی چھٹی مردم شماری کے انتظامات کا جائزہ لینے کے لئے پاک فوج کی کو آرڈینینش میٹنگ منگلا میں ہوئی جس میں کور کمانڈر منگلا لیفٹیننٹ جنرل عمر فاروق درانی، ادارہ شماریات اور سول انتظامیہ کے نمائندوں نے شرکت کی۔
آئی ایس پی آر کے مطابق پاک فوج مردم شماری میں بھرپور انداز میں حصہ لے گی اور اجلاس میں شریک تمام اداروں کے نمائندوں نے مردم شماری کے کامیاب انعقاد کے حوالے سے تیاریاں مکمل ہونے پر اتفاق کیا۔
ایمزٹی وی(جکارتہ)سعودی عرب کے شاہ سلمان اور انڈونیشیا کے صدر جوکو ویڈو دو نے بین المذاہب ہم آہنگی کے فروغ کے لئےمختلف مذاہب کے نمائندگان پر مبنی وفد سے جکارتا میں ملاقات کی۔ سعودی فرماں رواں شاہ سلمان نے کہا ہے کہ تمام مذاہب کو بھائی چارہ بڑھانے پر زور دینا ہوگا۔
انڈونیشیا کے تین روزہ دورے پر سعودی عرب کے شاہ سلمان نے انڈونیشیا میں بین المذہب ہم آہنگی کو سراہتے ہوئے کہا کہ مسلمانوں اور دیگر مذاہب کو ایک دوسرے کے درمیان بھائی چارہ بڑھانے پر زور دینا ہوگا۔
انڈونیشیا کے صدر کا کہنا تھا کہ دنیا میں انتہا پسندی اور مذہب کے نام پر دہشت گردی کو شکست دینے کے لئے مذاہب کے درمیان ہم آہنگی ہونا نہایت اہمیت کا حامل ہے
ایمزٹی وی(اسلام آباد)پاکستان تحریک انصاف کے چیرمین عمران خان نے حکومت کی جانب سے پی ایس ایل فائنل لاہور میں کرانے کے فیصلے کو تنقید کا نشانہ بنانے کے بعد اب ایک دلچسپ خواہش کا اظہار کیا ہے۔
میڈیا ذرائع کے مطابق عمران خان کی جانب سے جاری بیان میں کہا گیا ہے کہ اتنے عرصے بعد ملک میں کرکٹ ہو رہی ہے اور عوام کو ٹکٹ 12، 12 ہزار روپے میں ٹکٹ فروخت کیا جا رہا ہے جو انتہائی زیادتی ہے۔
عمران خان نے لاہور کے قذافی اسٹیڈیم میں اپنے نام سے منسوب انکلوژر کی ٹکٹ فری کرنے کی خواہش کا اظہار کیا ہے۔
ایمزٹی وی (اسلام آباد)اسلام آباد میں پیپلزپارٹی کی جانب سے بلائی گئی کثیرالجماعتی کانفرنس کے وقفے کے دوران میڈیا سے بات کرتے ہوئے شیخ رشید کا کہنا تھا کہ فوجی عدالتوں کے قیام میں 2 سال کی توسیع پر تمام جماعتیں متفق ہیں، پیپلز پارٹی اپنے تحفظات لے کر پارلیمانی کمیٹی میں آئے، آج کی کانفرنس میں ہماراایک ایجنڈا تھا، پیپلزپارٹی پاناما لیکس، نیوزلیکس اور نوازشریف سے تعلقات پر اپنامؤقف واضح کرے۔
شیخ رشید کا کہنا تھا کہ پیپلزپارٹی ایک بڑی جماعت ہے اور ہم چاہتے ہیں کہ نوازشریف کے خلاف اپنا کردار ادا کرے، میں نے پیپلز پارٹی کے شریک چئیرمین آصف زرداری سے کہا ہے کہ آپ اپنی پوزیشن واضح کریں، آپ کو نوازشریف کی انشورنس پالیسی سمجھا جاتا ہے اگر آپ ہمارے ساتھ مل کر نوازشریف کے خلاف سڑکوں پر نکلیں گے تو ہم بھی آپ کے ساتھ تب ہی چلیں گے آپ صاف صاف بتا دیں کہ نوازشریف کے خلاف ہیں یا نہیں، تو سابق صدر نے جواب دیا کہ میں نوازشریف کے خلاف ہوں۔
سربراہ عوامی لیگ کا کہنا تھا کہ میں نے آصف زرداری سے پوچھا آپ نے اعتزازاحسن کو پاناما کیس کے حوالے سے کیوں روکا جب کہ میں خود اعتزاز احسن کے پاس چل کرگیا تھا، جس پر آصف زرداری نے کہا کہ اس معاملے پرعمران خان اور آپ نے مجھے فون نہیں کیا اورنا ہی کوئی رائے لی، میں جلد پاناما لیکس کے حوالے سے ایک اور آل پارٹیز
شیخ رشید کا کہنا تھا کہ پی ایس ایل فائنل میچ دیکھنے کے فیصلے پر آصف زرداری نے مجھے کہا کہ آپ نے بڑی غلطی کی ہے، میں نے کہا کہ نوازشریف اورشہبازشریف نےمیرے ساتھ کچھ کیا تووہ خود ہی بھگتیں گے.
ایمزٹی وی(سبی)چار روزہ سبی میلے کا تیسرا روزخواتین کے لئے مخصوص کیاگیاہے۔ میلے میں خواتین بھرپور انداز میں شرکت کر رہی ہیں۔ان کی دلچسپی کےلئے مینا بازار لگایا گیا ہے جس میں مہندی، چوڑیوں اور دستکاری کے اسٹالزپر خوب رش ہے ۔ کھانے پینے کے اسٹالز پر بھی مزے مزے کے پکوان سے لوگ لطف اندوز ہو رہے ہیں ۔
سبی میلے میں دو روز سے خوب رونق ہے ،رنگا رنگ تقریبات میں لوگوں کا جوش و خروش بھرپور ہے ۔اعلیٰ نسل کے جانور بھی لوگوں کی توجہ کو مرکز بنے ہوئے ہیں ۔ میلے میں ملک بھر سے اعلیٰ نسل کے جانور بھی لائے گئے ہیں۔ خاص طورپر بھاگ ناڑی نسل کے خوبصورت بیلوں کو خریدنے کے لیے بڑی تعداد میں خریداربھی آئے ہیں ۔
میلے میں آج بھی گھڑ سواری اور نیزہ بازی کے مقابلے ہیں ، فلاورشو بھی میلے کے رونق بڑھا رہا ہے۔ آج شام علاقائی رقص کا پروگرام منعقد ہوگا،جس میں مقامی فنکاروں نے حصہ لیا ۔سبی میلہ کل تک جاری رہے گا
ایمزٹی وی(راولپنڈی)آرمی چیف جنرل قمر جاوید باجوہ سے ایران کے سفیر مہدی ہنر دوست نے ملاقات کی ہے۔پاک فوج کے شعبہ تعلقات عامہ (آئی ایس پی آر ) کے مطابق آرمی چیف اور ایرانی سفیر کی ملاقات میں آرمی چیف نے کہا کہ پاک فوج ایران کے ساتھ تعلقات پر کوئی سمجھوتہ نہیں کرے گی،پاک فوج برادر ممالک کے ساتھ تاریخی تعلقات کو بہت اہمیت دیتا ہے۔
جنرل قمر باجوہ نے مزید کہا کہ پاک ایران فوجی تعاون سے علاقے میں امن کو فروغ ملے گا۔
ملاقات میں ایرانی سفیر نے علاقائی امن و استحکام کیلئے پاک فوج کے کردار کو سراہا ہے اور کہا کہ دہشتگردی کے خاتمے کیلئے آپریشن ردالفساد قابل تعریف اقدام ہے۔
دونوں رہنماﺅں کے درمیان ملاقات میں علاقائی سکیورٹی اور باہمی دلچسپی کے امور پر تبادلہ خیال کیا گیا۔