جمعہ, 04 دسمبر 2020

 

ایمز ٹی وی(مانیٹرنگ ڈیسک)فیس بک پر ناپسندیدہ شخصیات سے بچنے کا ایک طریقہ بلاک کرنا ہے۔ اگر آپ چاہتے ہیں کہ کسی شخص کو آپ کی کوئی خبر نہ ملے، وہ آپ سے فیس بک پر رابطہ کرنا تو دور آپ کو دیکھ بھی نہ سکے تو اس کے لیے آپ بآسانی اس شخص کو بلاک کرسکتے ہیں۔ لیکن فیس بک پر ایک شخص ایسا ہے جسے آپ کسی صورت بلاک نہیں کرسکتے۔ وہ شخص کوئی اور نہیں بلکہ فیس بک کے بانی مارک زکر برگ ہیں۔ آپ فیس بک کے تمام عہدے داران بشمول چیف آپریٹنگ آفیسر شیرل سینڈ برگ کو بلاک کر سکتے ہیں۔ حتیٰ کہ آپ زکر برگ کی اہلیہ پریسیلا چین کو بھی بلاک کر سکتے ہیں لیکن آپ فیس بک کے تخلیق کنندہ زکر برگ کو کسی صورت بلاک نہیں کرسکتے۔ آپ کو یقین نہ آئے تو آپ خود ہی آزما کر دیکھ لیں۔

 

 

ایمز ٹی وی(شیخوپورہ)شیخوپورہ کے علاقہ خانقاہ ڈوگراں میں ڈکیتی کے دوران چھینی گئی کار 12روز بعد تھانہ فیکٹری ایریا کے سب انسپکٹر نوید سکندر اور ہیڈ کانسٹیبل محبوب سے برآمد ہو گئی جنہوں نے گاڑی پر سرکاری نمبر پلیٹ بھی لگائی ہوئی تھی ،ڈی پی او شیخوپورہ نے انکوائری کے بعد مذکورہ سب انسپکٹر اور اس کے ساتھی کیخلاف مقدمہ درج کر کے انہیں گرفتار کر لیا ہے اور عدالت سے ملزمان کا ریمانڈ بھی حاصل کر لیا ۔ شیخوپورہ سے ایک ٹیکسی کرائے پر خانقاہ ڈوگراں کے لیے بک کی گئی جب ڈرائیور کار لیکر خانقاہ ڈوگراں پہنچا تو وہاں پولیس کی وردی میں ملبوس ڈاکوئوں نے ڈرائیور کاشف سے گاڑی چھین لی اور اسے باندھ کر کھیتوں میں پھینک گئے جس کو مقامی لوگوں نے تھانے پہنچایا چند دن بعد ہی پولیس ملازمین مذکورہ گاڑی لیکر ایک میڈیکل سٹور پر پہنچے جہاں ڈرائیور کے ایک ساتھی نے گاڑی پہچان لی اور اس کی تصویریں اتار کر پولیس کو فراہم کردی۔ پولیس نے میڈیکل سٹور سے سی سی ٹی وی فوٹیج حاصل کی تو پتہ چلا کہ گاڑی ہیڈ کانسٹیبل محبوب لے کر آیا تھا جو آج کل تھانہ فیکٹری ایریا میں تعینات تھا جب خانقاہ ڈوگراں پولیس نے تھانہ فیکٹری ایریا میں چھاپہ مارا تو وہاں سے مذکورہ گاڑی برآمد ہوئی اور پتہ چلا کہ یہ گاڑی سب انسپکٹر نوید سکندر کے زیر استعمال ہے۔ تاہم گرفتار ہونے والے سب انسپکٹر نے ڈی پی او کے سامنے موقف اختیار کیا کہ مذکورہ گاڑی انہیں خانپور نہر کے کنارے کھڑی ملی تھی

 

 

ایمزٹی وی(تعلیم/ کراچی) جامعہ این ای ڈی کو مالی بحران سے نکال کر قرضے ختم کرنے والے وائس چانسلر ڈاکٹر افضل حق کو دوسری مدت دینے کے بجائے ان کو فارغ کرنے کے لیے قومی اخبارات میں وائس چانسلر کے تقرر کے لیے اشتہار جاری کر دیا گیا ہے، این ای ڈی یونیورسٹی کے وائس چانسلر ڈاکٹر افضال کی پہلی مدت 18؍مارچ کو ختم ہو گی جبکہ اگلے روز داؤد انجینئرنگ یونیورسٹی کے وائس چانسل ڈاکٹر فیض اللہ عباسی کی 4؍سالہ مدت پوری ہو گی اور اس سے اگلے روز شہید ذوالفقار علی بھٹو یونیورسٹی آف لاء کے وائس چانسلر جسٹس (ر) قاضی خالد علی کی پہلی چار سالہ مدت ملازمت مکمل ہو گی تاہم ان دونوں جامعات کے وائس چانسلر کی تقرری کے لیے اشتہار نہیں دیے گئے۔ پنجاب ہائر ایجوکیشن کمیشن کے چیئرمین ڈاکٹر نظام کے اعزاز میں منعقدہ عشائیہ میں میڈیا سے گفتگو کرتے ہوئے چند ہفتوں قبل قائم مقام سیکرٹری بورڈ و جامعات نوید شیخ جو بنیادی طور پر سیکرٹری سندھ ہائر ایجوکیشن کا کہنا تھا کہ وہ تینوں جامعات میں وقت پر وائس چانسلر کی تقرری کے لئے تینوں جامعات کا بیک وقت اشتہار ان کی مدت ختم ہونے سے پہلے دیں گے لیکن ایسا نہیں ہوا صرف جامعہ این ای ڈی کا ہی اشتہار دیا گیا ، ڈاکٹر فیض اللہ عباسی، جسٹس (ر) قاضی خالد علی کی کارکردگی اچھی ہے لیکن ڈاکٹر افضل حق نے نہ صرف جامعہ این ای ڈی کو مالی بحران سے نکالا بلکہ قرضے بھی ختم کرائے، جامعہ این ای ڈی کی ٹیچرز ایسوسی ایشن (نیٹا) کے صدر ڈاکٹر عثمان علی شاہ نے کہا کہ ہم اس معاملے پر ایگزیکٹو کونسل کا اجلاس طلب کررہے ہیں موجودہ وائس چانسلر کو ہٹانا ناانصافی اور میرٹ کے خلاف ہے کیوں کہ اُنہوں نے خسارہ ختم کر کے این ای ڈی کو اپنے پاؤں پر کھڑا کیا لیکن مسئلہ یہ تھا کہ ان پر ایک خاتون اسسٹنٹ پروفیسر اور ایک اور پروفیسر کو ترقی اور مراعات دینے کے لیے سخت دباؤ تھا لیکن اُنہوں نے انکار کیا جس کی وجہ سے این ای ڈی کا اشتہار جاری کرایا گیا۔ اُنہوں نے کہا کہ سندھ مدرستہ الاسلام اور نوابشاہ کی جنرل اور میڈیکل جامعات کے وائس چانسلرز کی دوبارہ تقرری کے لیے بھی اشتہار نہیں دیا گیا اور تینوں جامعات کے وائس چانسلرز کو اگلی مدت کے لیے ہی وائس چانسلر مقرر کر دیا گیا، اُنہوں نے کہا کہ جب تک وزیراعلیٰ ہاؤس میں مستقل سیکرٹری بورڈ و جامعات تعینات نہیں ہو گا اس طرح کے متنازع فیصلے ہوتے رہیں گے۔ یاد رہے کہ وزیر اعلیٰ ہاوس کا بورڈز و جامعات کا سکریٹریٹ جامعہ کراچی اور سندھ یونیورسٹی کے وائس چانسلر ز کی تقرری کی سفارش کے معاملے پر پہلے ہی تنقید کی زد پر ہے، امکان ہے کہ گورنر ہاوس میرٹ پر تقرری کو یقینی بنانے کے لئے سمری واپس بھجوادے گے

 

 

ایمز ٹی وی(کراچی) 13واں ویسٹ ایشیا بیس بال کپ پاکستان اسپورٹس کمپلیکس اسلام آباد میں 25 فروری سے یکم ما رچ تک کھیلا جائے گا۔ جس میں بھارت، ایران، عراق، نیپال ، سری لنکا اور پاکستان کی بیس بال ٹیموں کے 200 کھلاڑی ایکشن میں نظر آئیں گے۔ جن کو بہتر سہولتوں کے علاوہ فول پروف سیکیورٹی بھی فراہم کی جائے گی،ٹورنامنٹ کی تیاری کے سلسلے میں پاکستان فیڈریشن بیس بال نے پاکستان بیس بال ٹیم کا کوچنگ کیمپ اسلام آباد میں شروع کردیا۔ کھلاڑیوں میںعمیرا مداد بھٹی ، سمیر زوار، محمد عثمان، محمدوقاص اسماعیل ، عدنان بٹ، زبیر نواز، جوادعلی ، فضل الرحمن ، ابوبکر ورک ، ارشد خان ، علی، طاہر محمود، عبدالرحمن ، ذاکر آفریدی ، سید امین آفریدی، عنایت اللہ خان ، محمد زوہیب ، احسان اللہ ، فقیر حسین ، ارسلان جمشید ، عاطف، رفیع ، عارف ، طارق ندیم ، سید در حسین ، عمر فاروق، محسن جمیل ، محمد اسامہ ، صدام حسین ، نعمان ذوالفقار، ولی خان ، مجید، رضوان، توصیف، عبداللہ ، ریاض،عتیق ، حمزہ معظم ، محمد عرفان، لطیف ، کاشف افتخارشامل ہیں۔

 

 

ایمز ٹی وی(کراچی) لوکل گورنمنٹ اینٹی پرائیویٹائزیشن کمیٹی کے قائدین کنیز فاطمہ ،سیدذوالفقارشاہ ،ہارون حسن ،صالح شیدی ،جان محمد بلوچ،ماسٹرسیموئیل اور پرویز جدون نے کہا ہے کہ چائنا کمپنی کی صفائی ستھرائی کا کام سنبھالنے پر شہری دوہرے ٹیکس اور کچرہ بیگ کی قیمت ادا کرنے کے لیے تیار ہوجائیں۔ انہوں نے کہا کہ ہم نے تاحال بلدیہ جنوبی اور بلدیہ شرقی کے عوام کو گندگی کے ڈھیروں میں ڈالنے کی پریشانی سے بچانے کے لیے انتہائی قدم اٹھانے سے گریز کیا،لیکن حکومت سندھ کی جانب سے سیکرٹری بلدیات ،وزیربلدیات اور وزیراعلیٰ سندھ نے تاحال کوئی نوٹس لیا نہ ہمیں اس سلسلے میں اعتماد میں لیا گیا،لہذا اب سندھ سالڈ ویسٹ منیجمنٹ بورڈ کے قیام کے خلاف احتجاج کا فیصلہ کن مرحلہ اگلے ہفتے شروع کیا جائے گا، کیونکہ صفائی ستھرائی سے وابستہ عملے نے اب یونین رہنمائوں پر دبائو بڑھاتے ہوئے جلد ازجلد وزیراعلیٰ سندھ ،سندھ اسمبلی ،سندھ سیکریٹریٹ اور وزیربلدیات کے دفاتر کو کچرہ کنڈیوں میں تبدیل کرنے کی وارننگ دے دی، ورنہ عملے نے دھمکی دی ہے کہ اگر یونین رہنمامزید مصلحت کا مظاہرہ کرینگے تو پھر عملہ ازخود یہ کاروائی کرنے پر مجبور ہوجائے گا ۔

 

 

ایمز ٹی وی (مانیٹرنگ ڈیسک)سام سنگ کا نیا فلیگ شپ اسمارٹ فون گلیکسی ایس 8 جلد متعارف کرائے جانے کا امکان ہے جس کی ابھی تاریخ کا اعلان تو نہیں ہوا مگر جنوبی کورین کمپنی نے خود ہی اس کی پہلی جھلک کو لیک کردیا ہے۔ جی ہاں سام سنگ نے گزشتہ روز دو ویڈیوز ریلیز کی جس میں امولیڈ ڈسپلے کی خوبیوں کو بیان کیا گیا تھا اور یہ اسکرین گلیکسی ایس 8 میں استعمال کیے جانے کی توقع کافی عرصے سے کی جارہی تھی۔ ویڈیو میں یہ اسکرینز جس فون پر استعمال کی گئیں وہ بہت پتلا اور ایج لیس تھا اور ممکنہ طور پر یہی گلیکسی ایس 8 بھی ہے۔اس سے پہلے بھی اس فون کی جو غیر مصدقہ تصاویر لیک ہوکر سامنے آئی تھیں وہ اس ویڈیو میں دکھائے جانے والے فون سے ملتی جلتی تھیں۔ اس فون میں ہوم بٹن موجود نہیں جبکہ یہ گلیکسی ایس سیون کے مقابلے میں بہت پتلا اور ہلکا ہوگا جیسا ویڈیو سے اندازہ ہوتا ہے جبکہ اس کے اسکرین ریزولوشن دنگ کردینے والے ہیں۔ گلیکسی ایس 8 میں ایس سیون کے مقابلے میں پہلے سے تیز کوالکوم اسنیپ ڈراگون 835 پراسیسر، 8 جی بی ریم، بہتر کیمرہ اور بڑی اسکرین جیسے فیچرز موجود ہوں گے۔ایسا بھی کہا جارہا ہے کہ سام سنگ کے اس نئے فلیگ شپ فون میں آئی فون سیون کی طرح ہیڈ فون پورٹ کو ختم نہیں کیا جائے گا جبکہ اینڈرائیڈ نوگٹ آپریٹنگ سسٹم ہوگا۔ عام طور پر سام سنگ کی جانب سے گلیکسی ایس سیریز کے فونز کو ہر سال بارسلونا میں ہونے والی موبائل ورلڈ کانگریس کے دوران متعارف کرایا جاتا ہے تاہم اس بار کہا جارہا ہے کہ ایس ایٹ اپریل تک پیش کیا جائے گا۔سام سنگ کو توقع ہے کہ یہ بھی گلیکسی ایس سیون کی طرح کامیاب ثابت ہوگا اور فروخت کے آغاز پر ایک کروڑ سیٹس فروخت کرنے کا ہدف طے کیا گیا ہے۔