ایمز ٹی وی (بزنس) مقبوضہ کشمیر اور آزاد کشمیر کے درمیان چھ روز بعد تجارتی سرگرمیاں بحال ہوگئی ہیں۔
ٹریڈ اینڈ ٹریول اتھارٹی کے ڈائریکٹر جنرل بریگیڈیئر (ر) امتیاز وائیں کا کہنا ہے کہ آزاد کشمیر سے 50 ٹرک مقبوضہ کشمیر جبکہ ، مقبوضہ کشمیر سے 21 ٹرک واپس آزاد کشمیر پہنچ گئے ہیں ۔ چھ روز قبل مقبوضہ کشمیر انتظامیہ کی جانب سے ٹرک سے ممنوعہ سامان کی برآمدگی کے الزام پر تجارت بند ہوگئی تھی ۔
ایمز ٹی وی (سائنس اینڈ ٹیکنالوجی) امریکی کمپنی نے مشکل راستوں اور مقامات پر چڑھنے والا روبوٹ تیار کرلیا، اس چار ٹانگوں والی مشین کو اسپاٹ کا نام دیا گیا ہے۔ اس اسپاٹ کا اونچے نیچے راستوں پر بھی توازن برقرار رہتا ہے، گوگل کی ذیلی کمپنی کے اس روبوٹ کا وزن 73 کلوگرام ہے، اس میں نصب ہائیڈرولکس مکینیکل سسٹم کو کنٹرول کرتا ہے۔
اسپاٹ نامی روبوٹ کے سینسرز اسے اطراف میں موجود اشیاء کے بارے میں سنگلز دیتے ہیں،جو مشکل راستوں اور تیز رفتاری کے باوجود یہ اپنا توازن برقرار رکھنے کی صلاحیت رکھتا ہے اور ہنگامی حالات میں ایسے مقامات پر پہنچ سکتا ہے جہاں انسان کا جانا فوری طور پر ممکن نہیں ہوتا۔
امریکی محکمہ دفاع کے لئے روبوٹس بنانے کیلئے بھی مشہور ہے، جو جنگ کے میدان میں فوجیوں کو مدد فراہم کرتے ہیں۔
ایمز ٹی وی (مقبوضہ کشمیر) مقبوضہ کشمیر میں حریت رہنما محمد مقبول بٹ شہید کی برسی پر مکمل ہڑتال کی گئی اور بھارت کیخلاف احتجاجی ریلیاں نکالی گئیں۔گزشتہ روز حریت رہنماؤں کی اپیل پر مقبول بٹ کی برسی پر ہڑتال کے موقع پر مقبوضہ وادی میں تمام کاروباری مراکز ، تعلیمی ادارے اور دفاتر بند رہے جبکہ شاہراہوں پر ٹریفک انتہائی کم تھا، مظاہرین کا کہنا تھا کہ بھارت شہید مقبول بٹ کا جسد خاکی ان کے ورثا کے حوالے کرے اور کشمیریوں پر مظالم کا سلسلہ بند کرے ۔
دوسری جانب قابض انتظامیہ نے بھارت کے خلاف مظاہروں کو روکنے کیلئے سرینگر اور مقبوضہ وادی کے دیگر علاقوں میں غیر اعلانیہ کرفیو نافذ کردیا جبکہ متعدد حریت رہنماؤں کو گھروں اور تھانوں میں نظر بند کردیا۔ بھارتی فوجیوں اور پولیس اہلکاروں نے شہریوں کو ایک جگہ پر جمع ہونے سے روکنے کیلئے سرینگر میں مختلف سڑکیں خار دار تاروں سے بند کر دیں جبکہ شہر کے مرکزی مقام لال چوک کی طرف مارچ روکنے کیلئے لوگوں پر شدید لاٹھی چارج کے ساتھ ساتھ آنسو گیس کی شیلنگ بھی کی۔
اس موقع پر حریت رہنما علی گیلانی نے کہا کہ بھارت کو اس حقیقت سے آگاہ ہونا چاہئے کہ وہ طاقت کے زور پر کبھی بھی کشمیریوں کے جذبہ حریت کو دبا نہیں سکتا ۔کشمیری عوام شہداء کے نقش قدم پر چل کر بھارت سے آزادی حاصل کریں گے جبکہ شہداء کے خون کیساتھ ہمیشہ وفا کی جائیگی۔
ایمز ٹی وی (فارن ڈیسک) تائیوان، تاٹرانس ایشیاء ائر لائن انتظامیہ نے تباہ ہونے والے طیارے میں ہلاک ہونے والے افراد کے لواحقین کو 3 لاکھ 7 ہزار پاؤنڈ (4 کروڑ 75 لاکھ روپے) فی خاندان دینے کا اعلان کیا ہے
فلائیٹ جی ای - 235 گزشتہ بدھ کو حادثے کا شکار ہوئی جس میں 58 افراد سوار تھے جن میں سے 42 ہلاک ہو گئے تھے جبکہ 16 کو فوری امدادی سرگرمیوں سے بچا لیا گیا تھا۔ جہاز میں عملے کے 5 افراد سوار تھے جبکہ دیگر 53 مسافروں میں سے 31 چینی سیاح تھے جو کہ چین واپسی پر اس افسوسناک حادثے کا شکار ہوئے۔
تحقیقاتی ٹیم نے اس بات کی نشاندہی کی کہ پائلٹ نے آخری موقع تک جہاز کو کنٹرول کرنے کی کوشش کی تھی مگر اس کے دونوں انجن ناکارہ ہو چکے تھے جس کی وجہ سے اس کو نہ بچایا جا سکا۔
ٹرانس ایشیاء کے ایک طیارے کو جولائی 2014 میں حادثہ پیش آیا تھا جس میں 47 افراد ہلاک ہوئے تھے اس حادثے کے بعد ہلاک افراد کے لواحقین کو 3 لاکھ ہزار پاؤنڈ رقم ادا کی گئی تھی لہذا ابھی بھی لواحقین کو اتنی ہی رقم دینے کا اعلان کیا گیا ہے۔
ایمز ٹی وی (فارن ڈیسک) چینی حکام نے افغان طالبان سے اپنی ملاقاتوں میں تشویش کا اظہار کیاکہ آپریشن ضرب عضب کے بعد افغانستان میں چھپے کچھ شرپسند چین کے مسلم اکثریتی صوبے میں داخل ہوکر وہاں امن وامان کامسئلہ پیداکرسکتے ہیں۔ چینی حکام اورافغان طالبان کی جاری بات چیت سے باخبر ذرائع نے نام ظاہر نہ کرنے کی شرط پر بتایا کہ چین نے افغان طالبان سے مدد مانگی ہے اوران پر زور دیا ہے کہ شر پسندوں کے چین میں داخلے کوروکنے کیلئے سرگرم کردار ادا کریں۔ چینی حکام کاخیال ہے کہ شمالی وزیرستان میں آپریشن کی وجہ سے بھاگ کر افغانستان داخل ہونے والے شرپسند افغان طالبان کے رحم وکرم پر ہیں اور ممکن ہے کہ وہ پاکستان کے قبائلی علاقوں میں دوبارہ نہ آ سکیں اس لئے وہ ایسٹ ترکمانستان موومنٹ میں شمولیت کیلئے چین کے جنوبی علاقوں میں داخل ہوسکتے ہیں۔ ذرائع کے مطابق چین کی حکومت افغانستان سے امریکی اور نیٹو فوجوں کے انخلاء کے بعد وہاں ہونے والی پیشرفت سے پریشان ہے۔
چین کوخدشہ ہے کہ افغان طالبان شمالی وزیرستان سے بھاگنے والے دہشتگردوں کوچین کے مسلم علاقوں میں داخلے میں مدددے سکتے ہیں۔اسی لئے چینی حکام نے افغان طالبان سے جاری مذاکرات میں اپنے تحفظات پہنچا دیے ہیں اورانہیں کہا ہے کہ ان عناصرکی سرپرستی نہ کریں۔یہ امرقابل ذکر ہے کہ قطر میں طالبان اورامریکا کے مابین مذاکرات ٹوٹنے کے بعد چینی حکام افغان طالبان سے رابطے جوڑنے کیلئے سامنے آئے تھے اور اس کامقصد افغانستان سے غیرملکی فوجوں کے انخلاء کے بعد جنگ سے تباہ حال ملک میںقیام امن اوراستحکام لانا تھا۔چینی حکومت اور افغان طالبان میں بات چیت میںچین کے تحفظات دورکرنے کے معاملے پر مثبت پیشرفت ہوئی ہے ۔
ایمز ٹی وی (کراچی)امامیہ اسٹوڈنٹس آرگنائزیشن پاکستان کراچی ڈویژن کے صدر بردار محمد عباس نے طلبہ یونین پر عائد پابندی کے حوالے سے المصطفی ہاوس سے جاری اپنے ایک بیان میں کہا کہ طلبہ یونین پر عائد پابندی جلد از جلد ختم کی جائے اور فورا طلبہ یونین کے الیکشن کا انعقاد کروایا جائے۔ ملک بھر میں طلبہ یونین پر عائد پابندی کی وجہ سے جامعات و کالجز میں زیر تعلیم طلباء و طالبات اپنے جمہوری حق سے محروم ہیں۔ تعلیمی اداروں میں جمہوری اقدار کا فروغ ملک میں جمہوری اقدار کو پروان چڑھا نے میں ساز گار ثابت ہوگا۔ارکانِ حکومت و پارلیمنٹ پر یہ ذمہ داری عائد ہوتی ہیں کہ وہ تعلیمی اداروں میں عائد طلبہ یونین پر عائد پابندی کے خاتمے کے لئے بل صوبائی و قومی اسمبلیوں میں منظور کروائی۔تعلیمی ادارے بالخصوص جامعات دنیا بھر میں جمہوریت کی نرسری تصور کی جا تی ہے اور اسی نرسری سے ہی مستقبل کے لیڈران جنم لیتے ہیں۔ پاکستان میں بھی طلبہ سیاست میں حصہ لینے والے طلباء و طالبات نے نہ صرف ملکی سیاست میں اہم کردار ادا کیا بلکہ ملکی بیوکریسی کا حصہ بن کر بھی ملک و قوم کی خدمت کی۔ان کا مزید کہنا تھا کہ ہر دور میں طلباء و طالبات نے ملک میں جمہوریت کے قیا م کی خاطر قربانیاں دی اور ملک میں عوام دشمن حکومت کے خلاف حقیقی حزب اختلاف کا کردار ادا کیا۔ پاکستان کی تاریخ اس بات کی شاہد ہے کہ ہر دور میں طلبہ یونین نے ملک میں آمرانہ حکومتوں کی سب سے پہلے مخالفت کی اور ان حکومتوں کے خلاف تحریکیوں میں اول دستے کا کردار بھی ادا کیا۔طلبہ یونین پر پابندی کے باعث طلباء و طالبات اپنی تعلیمی مشکلات کے لئے حل کروانے کے لئے کرپٹ انتظامیہ کے سامنے بے نظر آتے ہیں۔ جا معات کے پالیسی ساز اداروں میں طلباء و طالبات کی نمائندگی نہ ہونا ، طلبہ کے ساتھ زیارتی ہے جبکہ اساتذہ ، سیاست دانوں اور دیگر شعبہ جات سے تعلق رکھنے والے افراد کو ان اداروں میں نمائندگی دی جاتی ہے
ایمزٹی وی (لکی مروت) بدھ کو ضلع لکی مروت میں ڈپٹی کشمنر احسان اللہ کی زیر صدارت پولیو کے خاتمے کے حوالے سے قائم کی گئی کمیٹی کے اجلاس کے دوران بتایا گیا کہ کچھ ملازمین کے رویوں کی بدولت محکمہ صحت اورضلعی انتظامیہ کی جانب سے پولیو جیسے موذی مرض کے خاتمے کے لیے چلائی جانے والی مہم شدید متاثر ہورہی ہے۔اجلاس میں ڈپٹی سپرنٹنڈنٹ پولیس ( ڈی ایس پی) رفیع اللہ خان، ڈسٹرکٹ ہیلتھ آفیسر (ڈی ایچ او) ڈاکٹر نیک نواز، ای پی آئی کو آرڈینیٹر ڈاکٹر حفیظ اللہ، اے ایس ڈی ای او حمید اللہ، ڈسٹرکٹ خطیب مولانا عبد الوہاب اور ڈسٹرکٹ آفیسر فرید خان بھی اجلاس میں شریک تھے۔اجلاس کے دروان بتایا گیا کہ ڈسٹرکت ہیلتھ آفس میں بطور مالی کام کرنے والا دل نواز، اپنے بچوں کو پولیو کے قطرے پلوانے سے اجتناب برت رہا ہے۔اسی طرح ولائی شگئی کے بنیادی مرکز صحت کے سربراہ بھی اپنے بچوں کو پولیو سے بچاؤ کے قطرے پلوانے سے گریزاں ہیں۔ڈپٹی کمشنر نے بتایا کہ محکمہ صحت کے دو افسران ہاشم اور فرید خان نے حالیہ انسدادِ پولیو مہم کے دوران اپنے فرائض سرانجام نہیں دیئے۔انھوں نے بتایا کہ مقامی انتظامیہ نے خدشہ نقصِ امن (ایم پی او 3 ) کے تحت محکمہ صحت کے متعدد افسران کو گرفتار کرکے ان کے بچوں کو پولیو کے قطرے پلوائے ہیں تاہم مقامی ہیلتھ انتظامیہ کی جانب سے ان کے خلاف کوئی تادیبی کارروائی نہیں کی گئی۔ای پی آئی کورآرڈینیٹر نے اجلاس کے دوران بتایا کہ عیسیٰ خیل، تجازئی، احمد خیل اور پہاڑ خیل تھل کی یونین کونسلوں میں اس سے قبل چلائی گئی انسدادِ پولیو مہم ناکام ہوگئی تھی۔انھوں نے بتایا کہ فروری کے پہلے ہفتے میں ان یونین کونسلوں میں چلائی گئی پولیو مہم کی ناکامی میں محکمہ صحت کے ملازمین کا ہاتھ ہے، جس میں 421 موبائلوں،47 فکسڈ اور 23 گھر گھر جانے والی ٹیموں نے حصہ لیا اور جس کے دوران پانچ سال تک کی عمر کے 161,754 بچوں کو پولیو کے قطرے پلائے جانے تھے۔اجلاس میں یہ بھی بتایا گیا کہ گزشتہ پولیو مہم کے دوران پانچ سال تک کی عمر کے 4,325 بچوں کو پولیو کے قطرے نہیں پلوائے جا سکے، جن میں سے 2,867 بچوں کو ان کے والدین نے قطرے نہیں پلوائے جبکہ 1,458 بچوں تک رسائی نہ ہوسکی۔تاہم ڈسٹرکٹ میں مقیم شمالی وزیرستان ایجنسی کے 10,967 بے گھر بچوں کو پولیو کے قطرے پلوائے گئے۔ڈپٹی کمشنر احسان اللہ نے ڈسٹرکٹ ہیلتھ آفیسر کو ہدایت کی وہ پولیو مہم کی ناکامی کے ذمہ داران کا تعین کریں اور متعلقہ افسران و ملازمین کے خلاف کارروائی کریں۔انھوں نےمحمکہ صحت کے ان ملازمین و افسران کے نام بھی طلب کیے جو اپنے بچوں کو پولیو کے قطرے پلوانے سے گریزاں ہیں، تاکہ ان کی گرفتاری کےاحکامات جاری کیے جاسکیں۔ڈپٹی کمشنر نے مزید بتایا کہ پولیو کے حالیہ کیسز کے انکشاف کے بعد اس حوالے سے مزید بہتر اقدامات کرنے کی ضرورت ہے، جبکہ ان کا کہنا تھا کہ بچوں کو قطرے نہ پلوانے والے والدین کو راضی کرنے کے حوالے سے تعینات کیے گئے افسران کو پرکشش تنخواہیں اور مالی مراعات دی گئیں لیکن وہ اطمینان بخش نتائج دینے میں ناکام رہے۔احسان اللہ نے کہا کہ حکومتی افسران خصوصاً محکمہ صحت کے افسران کے خلاف انسداد پولیو مہم میں غفلت برتنے پر سخت کارروائی کی جائے گی۔
تحریک انصاف کے چیرمین عمران خان نے کہا ہے کہ الطاف حسین نے اپنے بیان پر معافی مانگ لی ہے لیکن ایم کیو ایم کے خلاف برطانوی ہائی کمشنر کو لکھے خط سے دستبردار نہیں ہوں گے۔نوشہرہ میں میڈیا سے بات کرتے ہوئے عمران خان نے کہا کہ ایم کیو ایم کے قائد الطاف حسین نے اپنے بیان پر معافی مانگ لی ہے لیکن بلدیہ ٹاؤن کا معاملہ بہت سنگین ہے، اس واقعے میں 257 غریب مزدوروں کو زندہ جلادیا گیا۔ وزیر اعظم نواز شریف کی ذمہ داری ہے بلدیہ ٹاؤن کے ذمہ داروں کے خلاف فوری ایکشن لیں۔ تحریک انصاف ایم کیو ایم کے ملک کی تمام سیاسی جماعتوں نے وزیر اعظم کو مسلح گروپس کے خاتمے کا مینڈیٹ دیا ہے۔ اس لئے اب ملک میں سیکیورٹی فورسز کے علاوہ کسی کو ہتھیار رکھنے کی اجازت نہیں ہونی چاہیے۔ ہمارے پالے ہوئے مسلح گروپس تباہی مچارہے ہیں۔عمران خان نے مزید کہا کہ انہوں نے جب بھی برطانیہ میں ایم کیو ایم کے خلاف کارروائی کی کوششیں کیں ، وہاں کے حکام اس سلسلے میں کوئی بھی کارروائی کرنے کو تیار نہیں تھے۔ نواز شریف کی ذمہ داری ہے کہ وہ برطانوی حکومت کو کہیں کہ کوئی بھی شخص وہاں سے نفرت انگیز تقاریر نہ کریں۔ انہوں نے مزید کہا کہ اس میں کوئی شک نہیں کہ سینیٹ کے انتخابات میں پیسہ چلتا ہے، ہم ایک نئی روایت لانا چاہتے ہیں ، وقت آگیا ہے کہ سینیٹ انتخابات میں حق رائے دہی خفیہ نہ ہو۔بعد ازاں اعمران خان نے لیڈی ریڈنگ اسپتال میں سانحہ پشاور کے زخمی احمد نواز کی عیادت کرتے ہوئے کہا کہ خیبر پختونخوا حکومت سے احمد نواز کے علاج کے لئے جو بھی ممکن ہوسکا خیبر پختونخوا حکومت کرے گی، احمد نواز کو علاج کے لئے برطانیہ بھجوایا جائے گا۔
ایمز ٹی وی ( کراچی)قومی احتساب بیورو (نیب) نے ایک سابق وفاقی وزیر اور ان کی اہلیہ کے خلاف معلوم ذرائع آمدنی سے بڑھ کر دولت اکھٹا کرنے کی تحقیقات کا فیصلہ کیا ہے۔بدھ کے روز نیب کے چیئرمین قمر زمان چوہدری کی صدارت میں منعقدہ بیورو کے ایگزیکٹیو بورڈ کے ایک اجلاس میں یہ فیصلہ کیا گیا کہ ڈاکٹر ارباب عالمگیر جو پیپلزپارٹی کی پچھلی حکومت میں وزیرِ مواصلات تھے، اور ان کی اہلیہ عاصمہ ارباب کے خلاف تحقیقات شروع کی جائیں۔اس جوڑے کے خلاف الزامات کی تفصیلات بیان کیے بغیر نیب کے ترجمان نے کہا کہ ’’بورڈ نے معلوم ذرائع آمدنی سے بڑھ کر دولت جمع کرنے کے سلسلے میں ارباب عالمگیر اور ان کی اہلیہ کے خلاف ایک شکایت تصدیق کے لیے منظور کرلی ہے۔‘‘
ایمز ٹی وی (اسلام آباد) پاکستان میں تین مارچ کو ہونے والے ایوان بالا یعنی سینیٹ کے انتخابات کے لیے پاکستان مسلم لیگ نواز نے پارٹی کے 20 امیدواروں کو ٹکٹ جاری کیے ہیں۔سرکاری ریڈیو کے مطابق وزیر اعظم نواز شریف نے بدھ کو مسلم لیگ نواز کے پارلیمانی بورڈ کے ساتھ مشاورت کے بعد ان امیدواروں کے ناموں کی منظوری دی۔صوبہ پنجاب سے ٹیکنوکریٹوں کی نشستوں کے لیے راجہ ظفر الحق اور پروفیسر ساجد میر کو ٹکٹ دیا گیا ہے جبکہ پنجاب میں عام نشستوں کے لیے وفاقی وزیرِ اطلاعات و قانونی امور پرویز رشید، مشاہد اللہ خان، نہال ہاشمی، چوہدری تنویر، ڈاکٹر آصف کرمانی، عبدالقیوم اور ڈاکٹر غوث نیازی کا انتخاب کیا گیا ہے۔پنجاب سے ہی خواتین کی مخصوص نشستوں کے لیے کرن ڈار اور نجمہ حمید کو ٹکٹ ملا ہے۔مسلم لیگ ن نے صوبہ خیبرپختونخوا سے سینیٹ الیکشن کے لیے جنرل (ریٹائرڈ) صلاح الدین ترمذی کو ٹکٹ جاری کیا ہے۔اسی طرح صوبہ سندھ میں سینیٹ کی عام نشست کے لیے سید ظفر علی شاہ کو میدان میں اتارا گیا ہے۔صوبہ بلوچستان سے سردار یعقوب خان ناصر، عامر افضل خان مندوخیل اور میر نعمت اللہ زہری سینیٹ الیکشن میں عام نشستوں کے حصول کے لیے مسلم لیگ ن کے امیدوار ہیں۔