لاہور: ورلڈ بیچ ریسلنگ چیمپین شپ میں اپنے اعزاز کا کامیابی سے دفاع کرنے کے بعد ریسلر انعام بٹ وطن واپس پہنچ گئے۔
تفصیلات کے مطابق ورلڈ بیچ ریسلنگ چیمپئین شپ میں سونے کا تمغہ جیتنے والے پاکستانی ریسلر کا لاہور میں والہانہ استقبال کیا گیا۔
اس موقع پر قومی ہیرو نے اپنے جذبات کا اظہار کرتے ہوئے کہا کہ اب ان کی نظریں اولمپکس پر مرکوز ہیں، جہاں گولڈ میڈل جیتنا ان کا مقصد ہے.
ان کا یہ بھی کہنا تھا کہ اگر حکومت اکیڈمی قائم کرے، تو پاکستانی ریسلر مزید میڈلز حاصل کرسکتے ہیں.
یاد رہے کہ انعام بٹ نے ترکی میں جاری ورلڈ بیچ ریسلنگ چیمپیئن شپ لگاتار دوسری بار جیت کر سونے کا تمغہ حاصل کیا ہے.
بیچ ریسلنگ چیمپیئن شپ میں ناروے، پرتگال، رومانیا، یوکرائن اور یونان کے ایتھلیٹس نے شرکت کی، مگر کوئی ریسلر انعام بٹ کے سامنے نہ ٹھہرسکا اور وہ اپنے اعزاز کا دفاع کرنے میں کامیاب رہے.
نیٹ نوے کلوگرام سینیئر کیٹگری کے فائنل میں انعام کا مقابلہ جارجیا کے پہلوان سے تھا۔
انعام بٹ نے حریف کو چاروں شانے چت کرتے ہوئے اپنے اعزاز کا کامیابی سے دفاع کیا اور پاکستان کو ایک بار پھر بیچ ریسلنگ کا عالمی چیمپین بنادیا۔