ایمزٹی وی(مانیٹرنگ ڈیسک) کیا آپ بڑی اسکرین والے اسمارٹ فون کی جگہ کریڈٹ کارڈ کے سائز کا موبائل استعمال کرنا پسند کریں گے؟
اگر ہاں تو ٹاکیز ٹی تھری نامی یہ موبائل فون آپ کو ضرور پسند آئے گا جو دیکھنے میں کسی کیلکولیٹر جیسا لگتا ہے۔
بارسلونا میں موبائل ورلڈ کانگریس کے دوران یہ موبائل فون متعارف کرایا گیا جو اپنی نوعیت کی منفرد ڈیوائس ہے۔
اس کی وجہ یہ ہے کہ موجودہ دور میں بڑے، ہائی ریزولوشن والے اسمارٹ فونز کو زیادہ پسند کیا جاتا ہے، مگر ٹاکیز ٹی تھری ایک ڈمب یا پرانے طرز کا فون ہے جس میں 0.96 انچ کا او ایل ای ڈی ڈسپلے دیا گیا ہے۔
اس کے بٹن بھی کسی بھی موبائل فون سے مختلف ہیں اور بظاہر تو کسی کو یقین نہیں آتا کہ یہ موبائل فون ہے۔
اس میں فیچرز نہ ہونے کے برابر ہیں یہاں تک کہ اسکرین بھی کلر نہیں تاہم ایک چارج پر اس کی بیٹری 72 گھنٹے ضرور چل سکتی ہے۔
اور ہاں اس میں تھری جی کنکشن اور وائی فائی بھی موجود ہے مگر انٹرنیٹ کی اسپیڈ اتنی کم ہوتی ہے کہ معلوم ہوتا ہے انٹرنیٹ اس پر استعمال نہیں ہوسکتا۔
اگر آپ کو اسمارٹ فونز زیادہ پسند نہیں اور محض کال کرنے کے لیے ہی موبائل استعمال کرنا چاہتے ہیں تو یہ فون محض 33 ڈالرز یا ساڑھے تین ہزار پاکستانی روپے میں برا نہیں۔
ایمز ٹی وی(اسپورٹس) پاکستان سپر لیگ (پی ایس ایل) کے دوسرے ایڈیشن کے فائنل میں پہنچنے والی ٹیم کوئٹہ گلیڈی ایٹرز میں شامل تمام غیر ملکی کھلاڑیوں نے لاہور آنے سے معذرت کر لی ہے۔
تفصیلات کے مطابق کوئٹہ گلیڈی ایٹرز کی ٹیم میں شامل اہم غیر ملکی کھلاڑی کیون پیٹرسن پشاور زلمی کے خلاف اہم میچ میں عمدہ اننگز کھیلنے اور ٹیم کی جیت کے بعد واپس لندن روانہ ہو گئے ہیں جبکہ لیوک رائٹ اور ٹائمل ملز نے فائنل کھیلنے کیلئے لاہور آنے سے معذرت کر لی ہے۔
کوئٹہ گلیڈی ایٹرز کی ٹیم پہلے پلے آف میچ میں سنسنی خیز مقابلے کے بعد پشاور زلمی کو ہرا کر پی ایس ایل کے فائنل میں جگہ بنا چکی ہے جو 5 مارچ کو لاہور میں کھیلا جائے گا۔ کوئٹہ گلیڈی ایٹر کی ٹیم میں کیون پیٹرسن، رائلی روسو، نیتھن میکالم، ٹائمل ملز اور لیوک رائٹ شامل ہیں۔
لیوک رائٹ نے سماجی رابطے کی ویب سائٹ ٹوئٹر پر جاری پیغام میں کہا ہے کہ ” بڑے بوجھل دل کے ساتھ یہ کہہ رہا ہوں کہ میں لاہور نہیں آ رہا۔ میری فیملی جوان ہے اور میں ایک کرکٹ میچ کیلئے رسک نہیں لے سکتا۔ میں معافی چاہتا ہوں، کیونکہ میں جانتا ہوں کہ یہ آپ کیلئے کیا اہمیت رکھتا ہے لیکن امید ہے کہ مستقبل میں سیکیورٹی کا کوئی مسئلہ نہیں ہو گا، میں ایک بار پھر منتخب کرنے پر کوئٹہ گلیڈی ایٹرز کا شکریہ ادا کرتا ہوں، بہت ہی پیارے لوگ ہیں اور پی ایس ایل ٹیلنٹ سے بھرپور زبردست ٹورنامنٹ ہے۔“
ٹائمل ملزنے بھی لاہور آنے سے معذرت کی ہے اور اپنے پیغام میں کہا ہے کہ ”فائنل کی جانب یادگار سفر! ایک وجہ جس کیلئے ہم بہترین کھیلے۔ بدقسمتی سے میں فائنل کیلئے لاہور نہیں آ رہا لیکن اپنے گھر ٹی وی پر میچ دیکھوں گا اور لڑکوں کو سپورٹ کروں گا، جو بالکل ایسے ہی مقابلہ کریں گے جیسا وہ پورے ٹورنامنٹ میں کرتے آئے ہیں۔ کوئٹہ گلیڈی ایٹرز اور پی ایس ایل کا مشکور ہوں کیونکہ میں نے بہت ہی اچھا وقت گزارا ہے۔“
ایمز ٹی وی (تعلیم /کراچی )جامعہ کراچی کے مطابق بی کام پرائیویٹ کے رجسٹریشن فارم اور بی کام امپرومنٹ آف ڈویژن کے لئے فارم جمع کرانے کی تاریخ میں2 مارچ تک توسیع کردی گئی ہے۔
طلبہ اپنے رجسٹریشن فارم3500/= روپے فیس کے ساتھ بینک کائونٹرز واقع سلورجوبلی گیٹ جامعہ کراچی پر جمع کراسکتے
ایمز ٹی وی( تعلیم /کراچی )اعلیٰ ثانوی تعلیمی بورڈ کے چیئرمین پروفیسر انعام احمد اور ناظم امتحانات محمد عمران خان چشتی نے کہا ہے کہ کراچی کے طلباء کی علمی اور تخلیقی صلاحیتوں کو بڑھانے کیلئے اعلیٰ معیار کا امتحانی نظام تشکیل دینا چاہتے ہیں ۔
امتحانی پرچوں کو جدید تقاضوں سے ہم آہنگ کررہے ہیں، 2018ء میں پیپر کا پیٹرن بھی تبدیل کرنا چاہتے ہیں، اس سال سے کاپیاں جانچنے کے خواہشمند اساتذہ کو رجسٹر کر رہے ہیں،انٹربورڈ نے ماڈل پیپرز میں کوئی ایسی تبدیلی نہیں کی جس کیلئے قانونی اجازت کی ضرورت ہو۔
امتحانی پرچوں کو متوازن بنانے کیلئے ماڈریشن کا عمل بہتر کیا جائے گا،انٹربورڈ کراچی نے 2017ء کے سالانہ امتحانات کیلئے تیاریاں شروع کردی ہیں۔ اساتذہ کے ساتھ ملکر امتحانی پرچوں کا معیار بہتر بنانا چاہتے ہیں، سوسائٹی میں بورڈ کا اعتماد بحال کرنا ہم سب کی ذمہ داری ہے۔
ان خیالات کا اظہار انہوں نے اعلیٰ ثانوی تعلیمی بورڈ کے زیراہتمام سائنس اور لازمی مضامین کے پیپر سیٹرز اور ماڈریٹرز کیلئے سرسید گورنمنٹ گرلز کالج کے آڈیٹوریم میں منعقدہ سیمینار سے خطاب کرتے ہوئے کیا۔
اس موقع پر چیئرمین میٹرک بورڈسعید الدین صدیقی ،ڈائریکٹر جنرل کالجز ناصر انصار،ڈائریکٹر جنرل پرائیویٹ انسٹیٹیوشنز ڈاکٹر منسوب صدیقی نے بھی خطاب کیا ۔
ڈائریکٹر جنرل کالجز ناصر انصار نے کہا کہ امتحانی نظام کو بہتر اور معیاری بنانا بورڈ کیساتھ اساتذہ کی بھی ذمہ داری ہے، کاپیاں جانچنے کے عمل کو عالمی معیار کے مطابق بنایا جائے۔
ایمز ٹی وی (صحت /کراچی ) صوبائی وزیر صحت ڈاکٹر سکندر میندور نے منگل کو سول اسپتال کراچی اور لیاری جنرل اسپتال کا دورہ کیااور مریضوں کو دی جانےوالی سہولیات کا جائزہ لیا۔
اس موقع پر ان کےہمراہ غیر سرکاری تنظیم کے نمائندے بھی تھے جنہوں نے دونوں اسپتالوں کےلئے آپریشن تھیٹر میں استعمال ہونے والے سیکڑوں میڈیکل اور سرجیکل آلات عطیہ کیے ۔ اسپتالوں کے ایم ایسز نے اسپتال میں دی جانے والی سہولتوں پر بریفنگ دی ۔
صوبائی وزیر صحت کا اس موقع پر کہنا تھا کہ صوبے میں مریضوں کو صحت کی بہترین سہولیات فراہم کرنے کی کوشش جاری ہے ۔ اندرون سندھ میں صحت کے غیر فعال مراکز کو فعال کر رہے ہیں جس سے مریضوں کو گھر کے قریب صحت کی سہولیات میسر ہوسکیں گی۔
ایمز ٹی وی(تجارت) نیشنل الیکٹرک پاور ریگولیٹری اتھارٹی (نیپرا) نے بجلی کی قیمت میں 3 روپے 23 پیسے فی یونٹ کمی کی منظوری دےدی ہے۔
نیپرا ذرائع کے مطابق بجلی کی قیمت میں یہ کمی جنوری کیلئے فیول ایڈجسٹمنٹ کی مد میں کی گئی ہے تاہم اس کا اطلاق 300 یونٹس سے کم بجلی استعمال کرنے والے اور کے الیکٹرک کے صارفین پر نہیں ہو گا۔ بجلی کی قیمت میں کمی کا فیصلہ چیئرمین نیپرا طارق سدوزئی کی زیر صدارت عوامی سماعت کے دوران کیا گیا۔
ایمز ٹی وی(بیجنگ) دنیا بھر میں بڑے بڑے فراڈ ہوتے رہتے ہیں لیکن چین میں ایک شخص نے اتنا بڑا فراڈ کیا کہ اسے صدی کا سب سے بڑا فراڈ کہاجارہا ہے۔
چینی صوبے جینگ جیانگ میں لِن نامی شخص نے درخت کا ایک تنا صرف 200چینی ین (3000روپے) میں خریدا اور اسے چکر بازی کے ساتھ 1.68چینی ین (اڑھائی کروڑروپے) میں فروخت کردیا۔یہ درخت بیچتے ہوئے اس نے بتایا کہ یہ ایک انتہائی قیمتی (Phoebe zhennan)کی قسم ہے جو کہ صرف جیوزاو، ہوبائی اور سیچوان صوبوں کے جنگلوں میں پایا جاتا ہے۔ اس درخت کی لکڑی کو صرف وہ لوگ استعمال کرسکتے ہیں
جو بہت امیر کبیر ہوں اور ماضی میں اسے چینی بادشاہ ہی خریدسکتے تھے۔ کہاجاتا ہے کہ اس لکڑی سے ماضی میں ’مینگ‘حکومت کے باشاہوں کے تاج اور بیڈروم کے فرنیچر بنائے جاتے تھے۔موجودہ دور میں یہ درخت انتہائی قیمتی خزانہ سمجھا جاتا ہے اور اسے خوش قسمتی کے لئے استعمال کیا جاتا ہے۔لِن نے ایک جعلی سرٹیفکیٹ بنوایا جس میں بتایا گیا کہ یہ درختPhoebe zhennanہے اور یہ انتہائی بیش قیمت ہے۔ خریدار نے خوشی خوشی یہ درخت خریدا اور قیمت ادا کرنے کے بعد ایک Phoebe zhennanماہر کے پاس لے کرگیا تو اسے علم ہوا کہ وہ تو لُٹ چکا ہے۔خریدار نے لِن سے رابطہ کیا تو وہ رفو چکر ہوچکا تھا لیکن خوش قسمتی سے پولیس نے اسے گرفتار کرلیا ہے
ایمزٹی وی(اسلام آباد)سینیٹر سراج الحق سے پیپلز پارٹی کے وفد نے ملاقات کی ہے،امیر جماعت اسلامی نے کہا ہے کہ پیپلز پارٹی کی کل جماعتی کانفرنس میں مشاورت کے بعد شرکت کرنے نہ کرنے کا فیصلہ کریں گے۔
تفصیلات کے مطابق امیر جماعت اسلامی نے کہا ہے کہ فوجی عدالتوں میں توسیع کی آئینی ترمیم پر اتفاق رائے کے لیے وزیر اعظم محمد نواز شریف اور اپوزیشن لیڈر سید خورشید شاہ دونوں کی طرف سے تاخیر ہوئی ہے پیپلز پارٹی کی کل جماعتی کانفرنس میں مشاورت کے بعد شرکت کرنے نہ کرنے کا فیصلہ کریں گے جبکہ سابق چیئرمین سینیٹ پاکستان پیپلز پارٹی کے رہنما نیئر حسین بخاری نے الزام عائد کیا ہے کہ اس معاملے میں اسپیکر قومی اسمبلی اپنی غیر جانبدار حیثیت کو برقرار نہیں رکھ سکے اور وزیر اعظم و حکومت کے لیے سہولت کار بن گئے اسپیکر کاکام کسی بھی آئینی و قانونی ترمیم کا بل آنے کے بعد شروع ہوتا ہے ان خیالات کا اظہار دونوں رہنماﺅں نےگزشتہ شام اسلام آباد میں ملاقات کے بعد میڈیا سے بات چیت کرتے ہوئے کیا۔
پاکستان پیپلز پارٹی کے اعلیٰ سطح کے وفد نے فوجی عدالتوں میں توسیع پر وسیع اتفاق رائے سے متعلق کل جماعتی کانفرنس میں شرکت کی دعوت دینے کے لیے امیر جماعت اسلامی پاکستان سینیٹر سراج الحق سے ملاقات کی وفد کی قیادت پارٹی کے سیکریٹری جنرل نیئر حسین بخاری کر رہے تھے وفد میں سینیٹر فرحت اللہ بابر، سینیٹر عبدالقیوم سومرواور سردار علی خان شامل تھے ملاقات میں جماعت کی طرف سے قومی اسمبلی میں پارلیمانی لیڈر صاحبزادہ طارق اللہ، نائب امیر میاں محمد اسلم اور امیر جماعت اسلامی اسلام آباد زبیر فاروق خان بھی موجود تھے ۔
سینیٹر فرحت اللہ بابر نے کہا کہ فوجی عدالتوں میں توسیع کے حوالے سے کوئی عام بل نہیں آئے گا بلکہ آئین میں ترمیم ہونا ہے وسیع مشاورت کی ضرورت ہے جماعت اسلامی کو اے پی سی میں شرکت کی دعوت دی ہے اور جماعت اسلامی مشاورت کے بعد اپنی پوزیشن سے آگاہ کرے گی سینیٹر سراج الحق نے کہا کہ اس معاملے پر اتفاق رائے حکمران جماعت بالخصوص وزیر اعظم محمد نواز شریف کا کام تھا کیونکہ نیشنل ایکشن پلان کے حوالے سے آل پارٹیز کانفرنس وزیر اعظم نے ہی بلائی تھی انکی صدارت میں ہوئی تھی اور سیاسی جماعتوں نے ملکر نیشنل ایکشن پلان کے نکات کو حتمی شکل دی تھی 720دن گزر گئے ہیں حالات جوں کے توں ہیں اور ہم لاہور ، سیہون شریف اور چارسدہ میں سانحات اور حادثات دیکھ چکے ہیں قوم ایک بار پھر پریشانی کا شکار ہو گئی ہے حکومت کا موقف ہے کہ دو سال کے لیے فوجی عدالتوں کی مزید ضرورت ہے اور حکومت کے مطابق فوجی عدالتوں کے علاوہ کوئی راستہ موجود نہیں ہے حکومت نے حالات کے سامنے ہاتھ کھڑے کر دیے ہیں۔
انہوں نے کہا کہ کوئی بھی معاملہ عددی اکثریت کی بنیاد پر آگے نہیں بڑھتا قومی اتفاق رائے کرنا پڑتا ہے انہوں نے کہا کہ جمہوری نظام میں اسپیکر کاکام ثالث کا ہوتا ہے اورجب حکومت اور اپوزیشن میں تناﺅ یا کسی مسئلے پر شدید اختلافات پیدا ہو جائیں تو اسپیکر کو اس وقت ثالثی کرنی پڑتی ہے انہوں نے کہا کہ اس اتفاق رائے کے حوالے سے وزیر اعظم اور وزیر داخلہ کو سامنے آنا چاہیے تھا یہ اسپیکر کا کام نہیں تھا جب بل متعارف ہو جاتا اور کوئی ڈیڈ لاک پیدا ہو جاتا تو ساپیکر موثر کردار ادا کر سکتے تھے اور اس ڈیڈ لاک کو توڑنے کے لیے اسپیکر ہی آخری شخصیت ہوتی ہے مگر حکومت نے جو کام آخر میں کرنا تھا وہ پہلے مرحلے میں کر لیا۔
ایمز ٹی وی(نیو یارک) روس اور چین نے اقوام متحدہ میں کیمیائی ہتھیاروں کے استعمال کے الزام میں شام پر عالمی پابندیاں عائد کرنے کی مغربی ممالک کی نئی کوششوں کو مسترد کر دیا ہے۔
بی بی سی نیوز کے مطابق ایسا ساتویں مرتبہ ہوا ہے کہ روس نے شام پر پابندیوں عائد کرنے کے لیے اقوامِ متحدہ میں پیش کردہ قرارداد کو ویٹو کیا ہے،دوسری جانب چین بھی شام میں سنہ 2011 میں شروع ہونے والی خانہ جنگی کے بعد سے چھ مرتبہ اس قسم کی قراردادوں کو مسترد ہے۔
شام نے 2013 میں روس اور امریکہ کے درمیان طے پانے والے معاہدے کے تحت یہ رضامندی دی تھی کہ وہ اپنے کیمیائی ہھتیاروں کو تلف کر دے گا۔
روسی صدر ولادی میر پوتن کا کہنا ہے کہ شام کے خلاف پابندیاں مکمل طور پر نامناسب ہوں گی،اس سے صرف امن مذاکرات کو نقصان اور اعتماد کو ٹھیس پہنچے گی۔
امریکی سفیر نِکی ہیلے نے ردعمل میں کہا ہے کہ یہ ایک مایوس کن دن ہے جب اپنے ہی لوگوں کو مارنے والی رکن ریاستوں کے لیے دوسرے ارکان بہانے بنا رہے ہیں۔
ایمزٹی وی(اسلام آباد)وزیراعظم میاں نواز شریف کو اقتصادی تعاون تنظیم کے سربراہی اجلاس کیلئے چیئرمین منتخب کرلیا گیا ہے۔
تفصیلات کے مطابق اسلام آباد میں جاری اقتصادی تعاون تنظیم کے سربراہی اجلاس میں وزیراعظم میاں نواز شریف نے خطاب کرتے ہوئے کہا کہ اجلاس میں تمام مہمانوں کا خیرمقدم کرتے ہیں،علاقائی روابط کو مضبوط بنانے کیلئے ای سی او اہم فورم ہے،سربراہ اجلاس کامیاب بنانے کیلئے سیکرٹری جنرل اور انکی ٹیم کا مشکور ہوں۔انہوں نے کہا کہ ای سی او کا خطہ بے پناہ وسائل اور صلاحیتوں سے مالا مال ہے ،دنیا کی 52 فیصد تجارت ای سی او کے خطے سے ہوتی ہے،اجلاس میں چین اور اقوام متحدہ کے نمایندوں کی شرکت پر مشکور ہیں۔
وزیراعظم کا کہنا تھا کہ وقت آگیا ہے کہ ہم اپنا تاریخی کردار ادا کریں،مشترکہ خوشحالی کے لیے رابطوں کا فروغ ضروری ہے،سربراہ اجلاس میں رابطوں کو مضبوط بنانے پر توجہ مرکوز ہوگی۔
اجلاس سے خطاب کرتے ہوئے وزیراعظم نے مزید کہا کہ ای سی او کا خطہ تجارتی سرگرمیوں کا مرکز رہاہے،ریلوے،شاہراہیں اورتیل و گیس کی پائپ لائنیں خطے کو قریب لارہی ہیں۔
میاں نواز شریف نے کہا کہ مواصلات کے شعبوں میں بڑے پیمانے پر سرمایہ کاری ہورہی ہے،2013 سے حکومت سنبھالنے کے بعدپرامن ہمسائیگی کی پالیسی اپنائی ہے۔اقتصادی تعاون تنظیم کا 13 واں سربراہی اجلاس اسلام آباد میں جاری ہے جس کی صدارت اور میزبانی وزیراعظم میاں نواز شریف کررہے ہیں۔
اجلاس میں 5 صدور،3 وزرائے اعظم اور ایک نائب وزیراعظم شریک ہیں۔اس سے قبل 12 واں اجلاس باکو آذربائیجان میں 2012 ءمیں ہوا تھا جبکہ اجلاس میں ای سی او وژن 2025 ءکی منظوری دی جائے گی۔