ایمزٹی وی(کھیل) اولڈٹریفرڈ میں یاسرشاہ کو بدترین کارکردگی کی سزامل گئی، ٹیسٹ رینکنگ میں پہلی پوزیشن سے محروم ہوگئے۔ لارڈزمیں نام کمانے والے اولڈ ٹریفورڈ ٹیسٹ میں سب گنواں بیٹھے، پہلے ٹیسٹ میں انگلش بیٹسمینوں کا تگنی کا ناچ نچانے والے یاسر جس تیزی سے اوپر گئے اسی تیزی سے نیچے آگئے، یاسر شاہ نمبر ون پوزیشن پر صرف آٹھ دن رہ سکے۔
آئی سی سی کی جانب جاری کردہ نئی ٹیسٹ رینکنگ کے مطابق اولڈ ٹریفورڈ میں یاسر کی گیندیں انگلش بیٹسمینوں کو پریشان نہ کرسکیں اور وہ خود گھوم کر پہلے سے پانچویں نمبر پر چلے گئے جبکہ بھارت کے روی چندرایشون نے ایک بار پھر پہلی پوزیشن پر قبضہ کرلیا۔
ٹاپ ٹوئنٹی فائیو میں یاسر کے علاوہ قومی ٹیم کا کوئی بولر شامل نہیں، تجربہ کار یونس خان بھی تنزلی کا شکار ہوئے وہ ساتویں سے دسویں نمبر پر چلے گئے ہیں۔
اسد شفیق دو درجے تنزلی کے بعد تیرہویں اور سرفراز احمد اٹھاریوں نمبر پر آگئے، اولڈ ٹریفورڈ کی ڈبل سینچری نے جو روٹ کو رینکنگ کا دوسرا بہترین بیٹسمین بنا دیا ہے۔