ایمزٹی وی(خیبرپختونخواہ) سوات پولیس ٹریننگ سنٹر میں دو سو تیس جوانوں کی تربیت مکمل ہونے پر پاسنگ آوٹ پریڈ کا اہتمام کیا گیا۔ ٹریننگ کے دوران اچھی کارکردگی دکھانے والوں میں انعامات بھی تقسیم کئے گئے۔ تفصیلات کے مطابق سوات میں پیشہ ورانہ تربیت مکمل کرنے والے جوانوں نے شاندار پریڈ کا مظاہرہ کیا۔ عملی میدان میں قدم رکھنے والے جوان اپنے فرائض تندہی سے سرانجام دینے کے لئے پرعزم تھے۔

تقریب کے مہمان خصو صی ایڈیشنل آئی جی خیبرپختونخوا ڈاکٹر اشتیاق مروت تھے جبکہ ڈی آئی جی ملاکنڈ اور ڈی پی او سوات بھی اس موقع پر موجود تھے۔ مہمان خصوصی نے کہا کہ پولیس کے جوان ہر قسم کے حالات سے نمٹنے کیلئے تیار ہیں۔

سوات پولیس ٹریننگ سنٹر میں پاس آوٹ ہونے والے اہلکاروں کا یہ تیسرا بیج ہے اور اب تک ایک ہزار سے زائد جوان تربیت مکمل کرکے پولیس میں عملی خدمات سرانجام دے رہے ہیں