ایمز ٹی وی (پشاور)عاشورہ محرم الحرام کے دوران پشاور میں سیکورٹی انتظامات سے متعلق پولیس کے دعوے دھرے رہ گئے۔ شہر میں تاحال خفیہ کیمروں کی تنصیب کا کام بھی مکمل نہیں ہوسکا۔ 96 سی سی ٹی وی کیمروں میں سے اکثر نصب ہی نہیں ہوئے۔ جو کیمرے نصب کئے گئے ان کی ریکارڈنگ بھی غیر تسلی بخش ہے۔پشاور کو محرم الحرام کے دوران حساس ترین ضلع قرار دیا گیا۔ پولیس نے شہر بھر میں 96 خفیہ کیمرے نصب کرنے کا کام ایک پرائیوٹ فرم کودیا۔ کئی دن گزرنے کے باوجودبیشتر کیمرے نصب نہیں ہوسکے۔خفیہ کیمروں کاکنٹرول روم کوہاٹی چوک میں سپریم کمانڈ پوسٹ میں قائم کیا گیاہے۔ لیکن جو کیمرے نصب کئے گئے ان میں سے بھی اکثر صحیح طریقے سے کام نہیں کر رہے۔خفیہ کیمروں کی ریکارڈنگ کا ایک لنک پولیس افسران کے اسمارٹ فون پر ملناتھا۔ تاہم یہ کام بھی اب تک مکمل نہیں ہوسکا۔محرم الحرام شروع ہونے سے کئی روز قبل ہی پولیس حکام نے سیکورٹی مکمل ہونے کے دعوے کئے تھے۔ لیکن اب تک خفیہ کیمروں کی تنصیب کا کام ادھورا رہ جانا بہت سے سوالات کو جنم دیتا ہے۔