ایمزٹی وی(نئی دہلی)بھارتی آرمی چیف بیپن راوت نے الزام عائد کیا ہے کہ پاکستانی افواج کی جانب سے بھاری گولہ باری اور ماحولیاتی تبدیلیاں مقبوضہ کشمیر میں برفانی تودے گرنے کا باعث بن رہی ہیں۔
بھارتی میڈیا کے مطابق آرمی چیف بیپن راوت نے 25 جنوری کو برفانی تودے کی زد میں آکر مرنے والے میجر امیت ساگرکو خراج تحسین پیش کرنے کے بعد صحافیوں سے گفتگو کرتے ہوئے کہاکہ پاکستانی فوج کی جانب سے جنگ بندی کی خلاف ورزیاں اور بھاری ہتھیاروں کا استعمال برفانی تودے گرنے اور لینڈ سلائیڈنگ کا باعث بن رہا ہے۔ گلوبل وارمنگ کے باعث بھی گلیشیر میں دڑاڑیں پڑ رہی ہے۔
بھارتی آرمی چیف کا کہنا تھاکہ جن جگہوں پر برفانی تودے گرنے کا خدشہ ہے وہاں سے فوجیں واپس بلائی جا رہی ہیں تاہم بعض پوسٹیں شورش زدہ علاقوں میں واقع ہیں۔ ہمارے فوجی خطرے کا سامنا کررہے ہیں۔
فوجیوں کا مشن انسداد دراندازی ہے فوجی جوان دشواریوں کے باوجود اپنی ذمہ داری ادا کر رہے ہیں۔ میں اپنے فوجیوں کو یقین دلانا چاہتا ہوں کہ آپ اپنا فرض لگن سے ادا کررہے ہیں لیکن ہمیں دراندازی سے نمٹنا ہے۔
واضح رہے مقبوضہ کشمیر میں برفانی تودے گرنے کے باعث 15 فوجیوں سمیت 21 افراد ہلاک ہوچکے ہیں۔